Ballada o babuciu
Żyjym z gospodarki, uroda mi ginie
a ta moja staro rada chowie świnie,
S jednóm my tez mieli pieróńskóm ostude
Nic to żrać nie chciało, fórt to było chude
Staro do mie prawi, zabijesz brzidoka,
Pójdziesz do Ostrawy, kupisz tam cycoka
Jyny mi tez nie zrób, jako łóńskóm zime
Kiedyś nawalony leżoł we wiyrzbinie
Jo ji nie posłóchoł, co óna tam wyje
Jynych na nióm warknół, nagotuj pomyje
Trzista korón w kapsie, jo cały dziwoki,
Jadym do Ostrawy kupować cycoki,
Tak se s tym wózeczkym przez Ostrawe jadym,
Na rynkuch sie spotkoł s mojim kamaradym,
Ón stary kawałoch, witejże woźnico,
Dokónd że to jedziesz ty stary łopico,
Tóż my sie stawili do starej Salerki,
Kaj je fajne piwo i szwarne kelnerki,
Jak my sie sjawili w tej chrómskij putyce,
Jakisi chłop zaczón grac na harmónijce,
Też my se tam siedli w kóncie na dywanie,
Przi jakijsi starej usmarkanej Hanie,
Tak mie dorobiły ty chrómski łasice,
Dały sie mi napić samej szaracice,
A ta szaracica dała mi Jezusku,
Że mie mój kamarad musioł wiyźć na wózku
Uż s daleka woło na mojóm Tereze,
Gotujcie pomyje cycoka wóm wiezie,
Tereska wybiygła woło na Maryje,
Łap dyszel od wózka i uż go nim bije,
Gdyby jo wiedziała jakoś ty je slywa,
Za to ty barabo pójdziesz spać do chlywa,
Do chlywa mie wcisła ta Tereza moja,
Nogóm żech zachoczył, szas pyskym do gnoja
Gymba jako przetak, w kanale pazury,
Całóm noc mi lazły po pyszczysku szczury,
Tak mie dorobiły ty chrómski brzidoki,
Uż bych wiyncyj nie szoł kupować cycoki,
Ene due rajne, fazole sóm fajne,
Ene due rajne fazole sóm fest!
